Гонзало Виљар (27) е нов играч на Динамо Загреб. Станува збор за играч кој во Загреб дојде од шпанскиот второлигаш Гранада. Виљар најдобро се снаоѓа на позицијата заден играч за врска, а оваа сезона има 40 настапи за Гранада, постига два гола и една асистенција. Тој потпиша повеќегодишен договор со Динамо.
„Штом слушнав за интересот на Динамо, не се двоумев ниту секунда. Среќен сум што пристигнав во Загреб и се радувам на новите предизвици што ме очекуваат тука. Слушнав многу за клубот, со оглед на одличните резултати во Европа, а исто така сум добар пријател со Раул Торенте и Дани Олмо, кои ми кажаа сè за Динамо и фантастичните навивачи кои го следат клубот. Веднаш се фаќаме за работа. Најважната цел е да ја вратиме титулата во Загреб“, рече Виљар на презентацијата.
Шпанецот има богато искуство. Играше за Валенсија, Елче, Хетафе, Рома и Сампдорија, а во Гранада е од летото 2023 година, кога пристигна од Рома за 1,8 милиони евра.
Тој одигра и еден натпревар за шпанската репрезентација и беше стандарден млад репрезентативец.
Пред четири години, Виљар вредеше 15 милиони евра на фудбалскиот пазар, а имаше 64 настапи за Рома.
Денес, неговата вредност е два милиони евра (според Трансфермаркт), а тој беше под договор со Гранада до летото 2027 година.
Шпанските медиуми објавија дека Гранада треба да добие три милиони евра со 15 проценти од следниот трансфер.
