Шпанската „Марка“ пишува за битката меѓу Реал Мадрид и Барселона за потписот на еден од најталентираните млади шпански фудбалери. Станува збор за Антонито, 18-годишниот крилен напаѓач на второлигашот Малага и репрезентативец на Шпанија до 19 години.
Според „Mарка“, трансфер во некој од гигантите би можел да се случи веќе во јануари 2025-та. Антонито е под договор со Малага до следното лето и одби да го продолжи, што значи дека би можел да го напушти клубот без обештетување на крајот од сезоната.
Затоа е реално да се очекува трансфер зимава бидејќи тоа е последна шанса за Малага да заработи на младиот играч. Според Трансфермаркт Антонито вреди два милиони евра.
Антонито е роден во Андалузија, а првите фудбалски чекори ги направи во младинската академија на Бетис, од која се пресели во Малага. Минатата сезона ја собра првата сениорска минутажа во третата лига, а сега е стандарден играч и еден од главните играчи на тимот во „Сегунда“.
На 13 настапи тој постигна три и асистираше за уште три гола. Неговото целосно име е Антонио Кордеро, но попознат е како Антонито. Од неодамна негов агент е Пини Захави, човек кој е многу близок до Барселона и кој ги застапува Ханси Флик и Роберт Левандовски, но тоа не мора да значи дека Барселона има предност.
